〈夥記，畀個南北朝的公仔麵嚟！〉

清仔好似好變態，想挾隻狗放入出前一丁。

假如有一日，你在茶記聽到：「夥記，畀個南北朝的公仔麵我！」你會覺得他痴線定有文化？不過，假如我同你講，南北朝真的有公仔麵。你會不會覺得他好有文化？其實不會，因為MENU 根本無南北朝公仔麵！喺茶記叫無的野，即是玩野；在茶記玩野，你碟餸會多左野。如此玩命之人，不是痴線，我解釋不了。

痴線的人，當然少不了古裝片的胡鬚豪俠，殺人前總在問：「來者何人！本大爺不殺無名小卒！」胡鬚佬如此求知慾強，大可升LEV 做學者，或轉型做商人，賣薯片，何必殺人？不過求知慾強確是好事，這次我們學學黃念欣教授，打爛沙盆璺到豚，講講公仔麵。

〈哥吃的不是齋，而是文化！〉

整到咁的齋，真是想食埋個仙人

我知道，宅男其實同大師一樣，都鍾意食長齋。不過，你如果以為食齋的起源同佛教有關，那你就大錯特錯了！因為食齋是中國傳統習俗，比佛教早了起碼五百年，只不過後來被佛教騎劫，才變成佛教嘅特色。

「食齋」在古代叫「素食」，可追溯到西周，大概三千幾年歷史。初時古人食齋，並非考慮健康，而是拜神[1]。當有先人去世，後人要喊兩次，朝晚各一，然後洗淨衫褲，寓意沖走衰起，最後食齋充饑，禮成了事。這個儀式，流傳至今。雖然我們無強迫喊幾多次，不過喪禮後亦要脫孝服，換新衫，到酒樓食齋。那齋宴就叫「解穢酒」。不過，亦有人喪禮後大魚大肉，有雞有菜，那餐不是「解穢酒」，而叫「應紅讌」或「英雄讌」[2]。